Aizawl the 6th June, 2024 (Thurs): Cyclone Remal avangin Aizawl District chu Mizorama chhiatna tuar nasa ber pawl niin, chhawmdawlna leh chhanchhuahna hna thawh mek a ni a. Ni 1st June, 2024 (Inrinni) a mithiamte'n joint inspection an neihna a an hmuh chhuah angin, Section 30 (2)(iii) of the Disaster Management Act, 2005 in thuneihna a pek angin Nazuk Kumar, IAS, Deputy Commissioner & Chairman, Aizawl District Disaster Management Authority chuan  thupek a chhuah a.

 May 28, 2024 a Hlimen-a chhiatna thlen na bul hnaia in ding 46 (sawmli paruk) a cheng te hi ruah a sur zel chuan a hlauhawm  theih dawn avangin, heng in a cheng te hi thuleh awm hma chu an in chhuahsan rih tur a nih thu thupek chhuahin, Melthum (Silaimual), Trinity Hospital bula chhiatna thlenna bul hnaia in ding pathum (3) a cheng te pawh ruah a sur zel chuan a hlauhawm theih dawn avangin, heng in a cheng te hi thuleh awm hma chu an in chhuahsan rih tur a ni bawk. Trinity Hospital, Melthum (Silaimual) bul a in ding, Pi C. Lalthangpuii in RCC building leh Assam Type pahnih (2), Link Road an lam a mi te hi ruahtui tam zawk a tlak zel chuan him lo thei a ngaih a ni.